The Earl of Errol (Alistair Hulett)

“The Earl of Errol” Sheet Music (pdf).
“The Earl of Errol” Karaoke (midi with lyrics).

Lyrics: Traditional.
Tune: Traditional.


Lord Errol, he’s got a bonnie place; it stands on yonder plain.
But a bad report this lady’s made that Errol’s no’ a man.

Wi’ the rantin’ o’t an’ the dauntin’ o’t an’ according as ye ken,
For the thing we ca’ the rantin’ o’t, Lady Errol lies her lane.

“As sure’s yer name’s Katie Carnegie an’ mine is Gibbie Hay,
I’ll mak yer faither sell his lands, yer tocher for tae pay.”

“Tae mak my faither sell his lands, wad that no’ be a sin?
Tae gie it tae a feckless lord that cannae get a son!”

Wi’ the rantin’ o’t an’ the dauntin’ o’t an’ according as ye ken,
For the thing we ca’ the rantin’ o’t, Lady Errol lies her lane.

“What needs I wash my petticoat an’ dry it on a dyke?
What needs they ca’ me Errol’s wife when I gang sae maiden-like?”

“What needs I wash my apron an’ hang it on a pin?
For lang will I gang but-and-ben ere I hear the bairnies’ din.”

Wi’ the rantin’ o’t an’ the dauntin’ o’t an’ according as ye ken,
For the thing we ca’ the rantin’ o’t, Lady Errol lies her lane.

So she’s awa tae Embro toun for tae try the law.
And Errol’s follaed after her, his manhood for tae show.

But up an’ spake her sister, whas name was Lady Jane,
“Had I been Lady Errol, I’d have shamed my ain guidman!”

Wi’ the rantin’ o’t an’ the dauntin’ o’t an’ according as ye ken,
For the thing we ca’ the rantin’ o’t, Lady Errol lies her lane.

But Errol’s got it intae his will tae choose a maid himself.
An’ he has taen a country lass cam in her milk tae sell.

“Look up, look up, my weel faurd lass. Look up an’ think nae shame.
I’ll gie tae ye five hundred pounds if ye’ll bear me a son.”

Wi’ the rantin’ o’t an’ the dauntin’ o’t an’ according as ye ken,
For the thing we ca’ the rantin’ o’t, Lady Errol lies her lane.

So they were intae ae bed laid an’ a’ the lairds looked on.
An’ a’ the fifteen vowed an’ swore, “Lord Errol’s proved a man!”

Wi’ the rantin’ o’t an’ the dauntin’ o’t an’ according as ye ken,
For the thing we ca’ the rantin’ o’t, Lady Errol lies her lane.

He’s locked his Peggy in a room three-quarters o’ a year.
An’ when three-quarters they were passed a braw young son she bare.

“Look up, look up, my weel faurd lass. Look up an’ think nae shame.
I’ll mak’ ye Lady Errol, an’ Kate shall be sent hame.”

Wi’ the rantin’ o’t an’ the dauntin’ o’t an’ according as ye ken,
For the thing we ca’ the rantin’ o’t, Lady Errol lies her lane.

There wasnae a lord in a’ the toun but tae Peggy gied a ring,
There wasnae a boy in a’ the toun but on Katie had a sang.

Wi’ the rantin’ o’t an’ the dauntin’ o’t an’ according as ye ken,
For the thing we ca’ the rantin’ o’t, Lady Errol lies her lane.

“Tak back yer dochter, Carnegie, an’ set her in a glen
For Errol cannae please her, nor nane o’ a’ his men.”

Wi’ the rantin’ o’t an’ the dauntin’ o’t an’ according as ye ken,
For the thing we ca’ the rantin’ o’t, Lady Errol lies her lane.


Leave a Reply: